~~~~நேர்மறை எண்ணம் கொள்வோமாக!!!~~~~

அளவற்ற அருளாளனும், நிகரற்ற அன்புடையோனுமாகிய அல்லாஹ்வின் திருப்பெயரால் துவங்குகிறேன்...

அஸ்ஸலாமு அழைக்கும் வரஹ்மதுல்லாஹி வ பரக்காத்தஹு....

நம்முடைய ஒவ்வொரு செயலும் எண்ணப்படியே அமைகின்றன.  அது உடனடியாக இருக்கலாம் இல்லையெனில் சற்று காலங்கள் கழித்தும் நடக்கலாம். இதனால் நாம் என்னும் எண்ணங்கள் நல் வழியில் அமைத்துக் கொண்டால் அதன் பலனும் நன்மையாகவே அமையும், இதனால் தீமையை விட்டு விலகி நிற்போம்.

ஒரு வேளை நாம் எண்ணும் அந்த செயல் நடக்காமல் போய் விட்டால், அதை நினைத்து வருந்தி நம் எதிர்கால சிந்தனையையும், செயல்களையும் வருத்திக் கொள்ளாமல், எது நடந்தாலும் நன்மைக்கே என்ற நேர்மறை எண்ணம் (Positive Thinking) கொள்வது அந்த ஒரு செயல் நடக்காமல் போனாலும், நாம் எதிர்கொள்ளும் மற்ற செயல்களை கவனத்துடன் மேற்க் கொள்ள உதவும், வெற்றிக் கொள்ள உதவும், மன அழுத்தத்தில் இருந்து நம்மை விடுவிக்கும்.

நாம் ஒன்றை நடக்கும் என்று எண்ணியோ அல்லது ஒன்றை எதிர்பார்த்ததோ நடக்காவிட்டால் அதன் மூலம் வேறு எதோ நன்மை இருக்கிறது என்று நம்புவதே சிறந்த நேர்மறை என்னத்திற்கு அழகு, விரக்தி அடைவதால் கடவுளின் நாட்டம் இன்றி எதையும் நம்மால் மாற்றி அமைக்க இயலாது.

அந்நிலையில் நமக்கு கீழ் உள்ளவர்களை  நாம் எண்ணிக் கொண்டால் நம் மனம் வெகு வேகமாக இலேசாக மாறும். இன்ஷா அல்லாஹ்...

இப்படித்தான் ஒரு புதுப் பேச்சாளர் ஒரு மேடைப் பேச்சுக்கு ரெடியாகி கொண்டிருந்தார். தன்னை பிரபலப்படுத்த விரும்பி, தானே தன் சொந்த செலவில் ஒரு நிகழ்ச்சியையும் ஏற்ப்பாடு செய்து, பலரை நிகழ்ச்சிக்கு அழைத்தும் இருந்தார்.

முதன் முதலில் மேடையில் பேச போவதால் ஒரு வித படபடப்பும், டென்சனும் அவரை ஆட்பறித்தது. எவ்வாறு பேசுவோமா என்ற பயம் தான்.

ஒரு விதமாக தன்னை தயார்ப்படுத்திக் கொண்டு கடைசியாக பேசுவதற்காக மேடைக்கும் போய் விட்டார், மேடையை தவிர மற்ற இடங்களில் எல்லாம் லைட் ஆஃப் ஆகி இருந்தது.

மனதுக்குள் ஒருவித படபடப்பு, ஏன் லைட் எல்லாம் ஆஃப் ஆகி இருக்கு, ஒரு வேளை நிறைய கும்பல் வந்து இருக்குமோ நம் பேச்சை கேட்க  என்று தன்னை தானே தேத்திக் கொண்டார்.

அவர் பேசும் நேரம் வந்ததும், அவர் தன் பேச்சை தொடங்க ஆரம்பித்தார். லைட்ஸ் எல்லாம் ஆன் ஆனது, பேச ஸ்டார்ட் பண்ணவருக்கு பயங்கர ஷாக்.

ஏனென்றால் அந்த மிகப் பெரும் அரங்கில் அவர் எதிர் பார்த்த அளவில் ஒரு கும்பலும் இல்லை, ஒரே ஒருவர் மட்டும் இருந்தார். அப்பவும் அவர் பேச்சை நிறுத்தவில்லை. ஒரு வழியாக தன் பேச்சை முடித்து, அங்கு வந்து இருந்த ஒருவருக்கு நன்றி சொல்லிவிட்டு கீழே இறங்கி வந்தார்.

ஏங்க சார் இவ்வளவு பெரிய அரங்கத்தில் யாருமே இல்லை, என் ஒரு ஆளுக்காக எதுக்கு நீங்க பேசணும் நிகழ்ச்சியை நிறுத்தி இருக்காலமே என்று கேட்டார்.

அதற்கு அவர் சொன்னார், இவ்வளவு நாள் பேச பழகி கொள்ளும் தருணங்களில் என்னுடைய கையையும் கரண்டியையுமே மைக்காக பேசி இருக்கேன்.

யாரும் இல்லாத என்னுடைய சிறு அறையில் கண்ணாடி முன்னாடி என் முகத்தை நானே பார்த்துக் கொண்டு, என் பேச்சை நானே கேட்டுக் கொண்டு பேசி பழகி இருந்தேன்.

ஆனால் இன்று எனக்காக மிகப் பெரும் அரங்கு, எனக்கே எனக்கு என்று மேடை, மைக், ஸ்பீக்கர் என்ற சகல வசதிகளும் என்னைத் தவிர என் பேச்சை கேட்க  நீங்களும், மேலும் இந்த புது அனுபவம் என்னை மேலும் பல மேடைகளை சந்திக்க தூண்டுகிறது, அனைத்தும் இறைவன் நாட்டப்படியே நடக்கிறது என்று அழகான நேர்மறை எண்ணத்தை அவருக்கு பதிலாக கொடுத்தார்.

மாறாக யாரும் வரவில்லையே, பணம் போய் விட்டதே, நேரம் போய் விட்டதே, இனி எங்கும் போய் பேசவேக் கூடாது என்று எதிர்மறையாக அவர் சிந்திக்கவும் இல்லை, பேசவும் இல்லை.

எது நடந்தாலும் அது இறைவன் நாட்டப்படி நடக்கிறது, நன்மைக்காகவே அமைகிறது என்ற நேர்மறை எண்ணம் நம்மை முன்னேற்றக் கூடிய உந்து சக்தியாக அமையும், வாழ்க்கையையும், கடினமான தருணங்களையும் மிக இலகுவாக பயணிக்க உதவும்.

எதிர்மறை எண்ணம் (Negative Thinking) என்பது நம்மை சிந்திக்க விடாது மூளையை மழுங்கச் செய்து மேலும் மேலும் தோல்வியையும் தீமையின் வழியிலும் அழைத்து செல்லும்.

.

நேர்மறை எண்ணத்திற்கு மேலும் ஒரு எடுத்துக் காட்டு, சமீமபாக எதோ ஒரு வலைத்தளத்தில் படித்த நினைவு:

தந்தை கொசு: உன் முதல் வேட்டை அனுபவம் எப்படி இருந்தது ???

குழந்தை கொசு: மிகப் பிரமாதம் மனிதர்கள் என்னைக் கைதட்டி வரவேற்றார்கள் !!!

மனிதர்கள் தன்னைக் கொல்லவதற்காகவே கையை தட்டினார்கள் என்று வருந்தாமல்,  கைதட்டி வரவேற்றார்கள் என நேர்மறையாக பார்ப்பது மிகச் சிறந்த நேர்மறை எண்ணம்.

அதுபோல் மனிதர்களும் நமக்கு நடக்கும் அனைத்து விஷயங்களையும் இறைவனின் நாட்டப்படி அமைகிறது என்று நேர்மறையாக எடுத்துக் கொண்டால் மனதில் கலக்கம் இருக்காது!! என்றும் மகிழ்வே!!!

நன்மையும் தீமையும் சமமாக மாட்டா, நீங்கள் (தீமையை) நன்மையைக் கொண்டே தடுத்துக் கொள்வீராக! அப்பொழுது, யாருக்கும் உமக்கிடையே, பகைமை இருந்ததோ, அவர் உற்ற நண்பரே போல் ஆகிவிடுவார். (அல் குர்ஆன்: 41:34)

இறைவைனின் வாக்கிற்கு ஏற்ப தூய்மையான நல்ல நேர்மறை சிந்தனைகளை கொண்டு தீயதை தடுப்போமாக!!! ஈருலக வாழ்விலும் வெற்றி பெறுவோமாக!!! 

உங்கள் சகோதரி

யாஸ்மின் ரியாஸ்தீன் 


டிஸ்கி: என்னுடைய பிளாக்கிற்கு ஒரே ஒருவர் மட்டும் படிக்க வந்தாலும், யாருமே வராத எத்தனையோ பிளாக் இருக்கும்போது எனக்காக ஒருவராவது வந்தாங்களே என்று நேர்மறை எண்ணம் கொண்டு மேலும் மேலும் எழுதி உங்கள் அனைவரையும் கொல்வேன். ஹி ஹி ஹி..